ភ្នំពេញ៖ សមាគម និងអង្គការចំនួនប្រកាសគាំទ្រយ់ាងពេញទំហឹងចំពោះលោក ហ៊ុន ម៉ាណែត សម្រាប់ការកាន់តួនាទីជានាយករដ្ឋមន្ត្រីថ្មី សម្រាប់អាណត្តិ ទី៧នេះ ដើម្បីបន្តដឹកនាំប្រទេសកម្ពុជា ពង្រឹងសុខសន្តិភាពកាន់តែរឹងមាំ ប្រទេសជាតិកាន់តែមានការអភិវឌ្ឍរីកចម្រើន និងមានមោទកភាព ហើយប្រជាជនកាន់តែមានជីវភាពធូរធារ និងរស់នៅប្រកបដោយសេចក្តីសុខសាន្តបន្តទៀត។

អង្គការ និងសមាគមទាំង៥ រួមមាន សមាគមជនពិការអង្គរ ការិយាល័យកណ្តាលនៅខេត្តសៀមរាប សមាគមយុវជនខ្មែរមហានគរ អង្គការជនពិការស្រុកត្បូងឃ្មុំ បណ្តុំអង្គការសង្គមស៊ីវិល និងសមាគមតន្រ្តីជនពិការកម្ពុជា បានថ្លែងអំណរដឹងគុណដល់សម្ដេចតេជោ ហ៊ុន សែន ដែលបានលះបង់ទាំងកម្លាំងកាយ កម្លាំងចិត្ត សាច់ស្រស់ ឈាមស្រស់ ជាង៤០ឆ្នាំមកនេះដើម្បីប្ដូរយកសន្តិភាព និងការអភិវឌ្ឍជូនមាតុភូមិទាំងមូល។

ញត្តិគាំទ្ររបស់សមាគម និងអង្គការទាំង៥ខាងលើបានបញ្ជាក់ថា ការខិតខំរបស់សម្តេច ក៏ដូចជាថ្នាក់ដឹកនាំគណបក្សប្រជាជនគឺមិនអាចកាត់ថ្លៃបាននោះទេ និងសូមសម្ដែងការគាំទ្រយ៉ាងពេញទំហឹងចំពោះ លោក ហ៊ុន ម៉ាណែត ដែលនឹងក្លាយជានាយករដ្ឋមន្ត្រីឆាប់ៗខាងមុខនេះ។

ទន្ទឹមនោះដែរ សមាគម និងអង្គការខាងលើគូសបញ្ចាក់ពីការបន្តឆន្ទៈគាំទ្រ និងដើរតាមមាគ៌ាគោលនយោបាយឈ្នះៗប្រកបដោយគតិបណ្ឌិតសម្ដេច តេជោ ហ៊ុន សែន និងលោក ហ៊ុន ម៉ាណែត ដើម្បីរក្សាបាននូវសុខសន្តិភាព និងការអភិវឌ្ឍជានិរន្តរ៍៕